Numeite' lungsim tawngh na thei nuam hia?

Numeite' lungsim tawngh na thei nuam hia? Anuai aa lai nasim suak in..


1) Tehkak kei in!
" Ama' zi in innkuan sung thu bangzah vaan zo aa, a papi tungah bangzah in thusiam aa" cih khawng tawh na zi pen midang' zi tawh tehkak ngei kei in.! Na zi tawh na omkhop theihna hunhoih hunpha pen adang bangmah tawh tehkak theihloh a manpha mahmah khat ahi hi. Na zi aw nisim in na zakna pen midang khat ii aw sangin kam khum penpen zaw ahi hi.


2) Awlmawh loin om ke'n!
Numeite' lungsim ngaihsuntna pen hih baih lua mahmah hi. A lawmngaih khat tawh kisai thu le la ahih nakleh zong aleh lamin la pah mawk uh hi. Nuak baih, haza baih cih khatin om uh hi. Hamsatna na tuah tak ciang ama tungah genin na nihun kikum khawm mainawt khawm hamtang di kisamh hi. A thaneem hun tak ciang zong a khut khauh takin len di-in itna hu tawh thapia thei di hi hangh. Nasem vai na kuankhiat ma-in tuithe bangin namh photin lenkhiat san hamtang di hiteh. Tuh mah bangin inn na tun kik ciangin zong na tunkik lam kawi hamtang di hiteh. Hih bang dan aa ahamsalo i bawlna i sepna hangin numeite in a khantawn un lungkiim mahmah aa zong maitai uh hi.

3) Na maitang kilangh sak kei in!
 Numei khat maigumna hansuahna maitang tawh a en, a sal pasal khat pen a etlawm lo mahmah khat ahi hi. Ei apualam ah sum le paai zongin man ngeilo zah dongin i om mah bangin numei na zi zong inn na asep teng, naucin naukep puansawp anhuan teng tawh man kisa ngei mahmahlo ahih lam phawk den in. Ka nung pan ka kisap khempeuh hong hun hong vaan pih khat om ahihman ken apua ah sum le paai nuamtakaa zong thei kahi ve maw cih phawk gige in. Nasepna pan na ciah kik tak ciangin zong "nupi nagim na? na tawl na?"    "Gim kang e, tawl kang e nang sum zong aa kong puapial kha nang hoh e tawl zawlo di na hia" cih kammal kithukh kikna pen zozu ningtui i dawn sangin khum zawlai di hi. 

4) Kidem hi.
Pasalte nasem kidem, neih le lamh vang kidem in aom mah bangun numeite zong atate uh a di-in milak ah kidemna khatmah na nei uh hi. Tuaih manin milak khawngah na zi pen hap,tai cih khawng aa na omdi pen kidawm mahmah in. Numei dangte ii hazat zah dong liangh di'nah na zi pen ngekbawl pibawl sawm mahmah in. Numei pilvaang khat ahih nakleh amah zong mi' mai-ah nang pen vang ong pianuam mahmah in ong thupi bawl mahmah kik pah di hi.

5) Mit tawh en thei
Pasalte in numei meelhoih mu uh leh a et gaakgaak mah bangun, numeite in zong pasal meelhoih a muh uhciang en thei uh hi. Hih pen i hazatnop, i hehnop pong mawk hang numei khat in pasal meelhoih a et leh pasal khat in numei meelhoih khat i etna lungsim pen ginalo zaw hamtang hi. Numeite'n a mit uhtawh na khat peuhpeuh a hoihna a et uh ciangin lungsim tawngh lungsim thukpi tak ngaihsutna tawh enlo uh hi. ( hoih acihleh hoih asa hi aa, a puatham bek hi. pasalte bangin lungsim sunmang khawng tai sakdaudau cihbang hilo hi. cihnopna ah pasal pawl khat pen hua tawh kithuah lengin tua ci di aa, a form tuci aa cih zah dong ciang ngaihsun toto kha thei mawk uh hi.)


6) Sat kei in!႔/ Na khutlum nga kei in!
Numei khat a vel, a sat, khutlum a nga pasal khat pen leitungah  a zumhuai penpen gamtatna ahi hi. Na ngaih takpi leh khat le khat kizahtakna aom kul hi. Na ngaih takpi keileh bel nang le nang na lungtang ki dongh kik in. Amah ka lungkiim saksuak zo diam? A zenzen in a lungnop na di'n na koisuak zawh kei di aa leh humcip kenla, khahkhia lel in! Suaktakna pia zaw in...!!@

7) Dik in.
Numei khat bangzah ta'n pilvaang mah tase leh pasal khat ii makaihna thu vaihawmna khat pen thupi sak zaw hamtang hi. Tu mah hileh kei adi'n muanhuai hi cih ngaihsun hi. Numeite in pasalte ii dikna pen cikmah hunin demzo ngeilo palsak ngam ngeilo uh hi. A zenzen in numeite ii dikna pasalte tungah zawhnopna galhiam khat ahih leh zong pasalte ii dikna pen numeite adi-in bomb pi khat ahi hi. Ahi tazong numeite pen apianpih uh nupi lungsim pen nei uh ahih manun koikoi i pai zongin muanlohna ata khat bangin ong ngaihsut theihna uh pen heh nadi thangpaih nadi hilo zawin, Nu kician khat khaici ahi gige lam phawk in. Numeite pen ong telsiam thei mahmah mah napi uh, hih hihke'n, tuh hihke'n cih mah ong khamm nuam sese uh hi. Hih te pen hansuah thangpaih laklo zawin dik tak aa i santheih di kisamh hi.

8) Innkuan in a khatna
Pasalte in nasep mawhpua uh hi. Nasep picin zawh nadi-in gamtat hoih kul hi. Nasepna sungah lungnop nadi-in sal tanna tawh nasem bang aa i ngaihsut khak nadi'n ngaihsut kul hi. Na i sepna pen innkuan sung adi, nek le dawn adi ahi tazong zi tawh ta tawh nopsak khop nadi hun zong pia zelzel in.

9) Sunghnu cih zongh Nu le pa mah ahi hi.
Na zi na ngaih mah bangin a nu zong na ngaihsak na itsak kul hi. Na lungsim sungah aw... hih pen ka pianna ka nu mah hikhong veh ee cih vom in. Na sunghnu na nu mah bangin na neih zawh leh amah'n zong a ta khat mah bangin ong ngaihsun zo pah di hi. Mihingte teek tetek haam tetek lengin naupang lungsim kipua aa, a teek tetek na sunghnu pen naupang khat bangin na kep na khoih zawh di hanciam inla, vaak in. A lungnop nadi'n bawl in. Limlangh khat a bawl bangin na suanlekhatte ii etteh theih di'n Uhaam te koici kep di cih lamlak khol in. Tuh hileh nikhat ni ciang nang zong ong kizahtak ong kilimbawl pah di hi.

10) Citakna, Upna, Mawhmaina, Telsiamna
 Mihing nih(2) kigawmkhop nadi-in hihte kisamh mahmah hi. Vai khempeuh kikumkhawm di, cih pongmawk hang khat veivei a piang theilo munte ah a diktat zuau zong ki zangh thei veve hi. Buaina hamsatna khat peuhpeuh aom ciang na zi namawhsak di na ngaihsut masak sang athuk adai cih ngaihsun masa inla, na zi ii thuak di dinmun kiukhat bek khual zel in. Nang in ama' ngaihpen na hih mah bangin thapia in. Maisak in. Telsiamin.