Leitungah Mi Hicidan Om Hi..

Leitungah Mi Hicidan Om Hi.......
     Innah ih om lai-in, an le tui a lim nono ong siah, khuahun vot leh puan tungsilh ong guan, hawhna ciahna ah kidop den di thu ong vaikhak tanghtangh, khat veivei ciang tuh bang aa ki gensuk ki gentoh bengngong sak i sak hangin itna tawh cimtaklo takaa ong telsiam, sum le paai deih hunhun in i nget ciang azu ahaam thuakin sum a kizong ahih lam..... sum ii manphatzia ong gen thei hi. Kamvang pan in phun mulmul thumm ngaungau kawm pi mahin akhut in sum ong piakhia veve hi. Tuh dan mi; "Nu & Pa" kici hi.

 Leitungah Mi Hicidan Om Hi.......
           Ahoih leh Ahoihlo khentel theih nadi'n sung aa piang tate bangin lam ong lakh, thu ong hilh hi. Thukhun tampi zong ong pia aa, thu manpha tuamtuam tampi zong ong hawm hi. Ong sat ong tai hang zong mihoih milian mimanpha suahdi ong deihsak man taktak ahi hi.Tuh dan mi; "Sya" kici hi.

Leitungah Mi Hicidan Om Hi.......
            Khat veivei kitawng kilai thei zelin, kam kinial thu kinial pih thei hi. Hoihlohna khat om leh lah Nu le Pa tungah ong khia ziauziau thei lai hi. Ahih hangin ei pen midangte sangin ong itzaw veve in ong don zaw veve hi. Thu hilo khat aom nakleh..... ih langte mai-ah ei mai aa athuak ngam hi. Tuh bang mite; "Sanggam" u le nau kici hi.

Leitungah Mi Hicidan Om Hi.......
             Kimu kikhawl kei leng ki lunglen lawh thei-in, kimu kikhawl lenglah laidip phu-in gen meldi theilo hukbit kibang thei hi. Lungsim sung ngaihsutna sungah a tawntung omden aa,,, nuam takin ihmu theilo zah dongin ih zalmang sung nangawn ah ong zel thei lai hi. Ei adi'n a hoih pen a limci pen singgah khat bang hi. Tuh dan mi; "Lawmngaih" kici hi.

Leitungah Mi Hicidan Om Hi.......
           Midangte theih khakloh ei ii thusim amah'n thei hi. Lai i theihloh i telloh ciang ong hilhcian thei hi. Khialhna khat i neih leh zong ei lam ah apang ngam hi. Thanem hunah tha ong pia thei-in, dah hun takciang heh ong nem hi. Nop i sak ciang amah kimangngilh thei aa, hamsatna i tuah ciang i phawk gige kha thei hi. Ih lungsim sung aa i puak thu i gen khak takciang lungduai takin ong ngaih sakaa, ei tawh omkhop di hun pen i lawmngaih khat tawh sangin sawtvei theizaw lai hi. Tuh dan mi; "Lawm" kici hi.

Leitungah Mi Hicidan Om Hi.......
             Nu le Pa ii ukna khutnuai sung pan a khangkhia hi. Syate ii thuhilhna sungah zong asia apha khentel thei-in aom hi. U le nau sanggamte lakah zong kipumkhatna telsiam mahmah ta hi. Lawmngaih ii itna ngaihna zong, zong thei mu thei ta aa, lawm le gualte ii huhna panpihna tawh zong mailam nuntakna kahlei tung tuangzo ta hi. Nasep silbawl zong teel thei tasam hi. Hih bang mite ei ii nuntakna ah lengla khat bangin zin ong tung uh aa, a hun a cin ciang ciahkhiakik uh hi. Amaute in ih nuntakna sungah khantohna thumuhna lungsim picinna tampi ong huh uh hi. Lungnopna zong tampi ong hawm uh aa, khat veivei ciang .... tuh bangmite lungdam kohdi nangawn peuh ki mangngilh thei zannzann hi. Tuh bang mi, "Ei mahmah" ihi hi.

Hanciam lai di...
Lungdam.